Fitueyðing með fituleysandi efni skilar einstaklingum varanlegum árangri

Frumuveggir fitufrumnanna eru brotnir niður og eyðist fitan hægt og rólega úr líkamanum í gegnum sogæðakerfið

Sprautumeðferð með fituleysandi efni inniheldur deoxycholic sýru, en það er sýra sem líkaminn þekkir vel, enda framleidd náttúrulega af bakteríum í þörmunum í þeim tilgangi að hjálpa til við niðurbrot fitu. Meðferðin er framkvæmd með þeim hætti að fituleysandi efni er sprautað inn í fitulag á meðferðarsvæði. Þar brýtur deoxycholic sýran niður frumuveggi fitufrumnanna og eyðist fitan sem til staðar er í fitufrumunum hægt og rólega úr líkamanum í gegnum sogæðakerfið. Árangur er varanlegur sé heilbrigðum lífstíl með hollu mataræði og reglulegri hreyfingu viðhaldið.

Nokkuð persónubundið er hversu fljótt árangur byrjar að koma fram og getur það verið allt frá þriðju viku eftir meðferð. Algengt er þó að það taki u.þ.b. 4 mánuði að sjá fullan árangur af meðferð.


Einföld og fljótleg meðferð sem krefst mun minna inngrips en skurðaðgerð

Sprautumeðferð með fituleysandi efni er frábær lausn fyrir þá sem vilja losna við fitu á erfiðum og afmörkuðum svæðum án þess að fara í skurðaðgerð. Þau meðferðarsvæði sem oft eru til vandræða hjá báðum kynjum þrátt fyrir heilbrigðan lífstíl eru m.a. upphandleggir, magi, læri og bak/mjaðmir. Um er að ræða einfalda og fljótlega meðferð sem hefur í för með sér vægar aukaverkanir og krefst mun minna inngrips en skurðaðgerð.

Fjöldi meðferða: Áætla má að framkvæma þurfi meðferð í 2-6 skipti til að ná sem bestum árangri, breytilegt er eftir meðferðarsvæði og líkamlegu ástandi hversu margar meðferðir þarf. Að lágmarki 6-8 vikur þurfa að líða á milli meðferða, fer eftir meðferðarsvæði.

Fyrir meðferð: Til að draga úr líkum á bólgu og mari eftir meðferð er gott að hafa í huga að gera hlé á notkun magnyls og annarra blóðþynnandi lyfja í 3-5 daga fyrir meðferð sé þess kostur. Það sama á við um inntöku lýsis og áfengis, sem bæði hafa blóðþynnandi áhrif.

Eftir meðferð getur roði verið til staðar í nokkrar klukkustundir og mar getur einnig myndast. Meðferðarsvæði bólgnar í langflestum tilfellum og getur bólga verið talsverð fyrstu dagana eftir meðferð.

Strax eftir meðferð má gera ráð fyrir að meðferðarsvæði sé aumt og viðkvæmt. Eymsli við snertingu geta verið til staðar í nokkrar vikur. Doði getur einnig verið til staðar á meðferðarsvæði fyrst eftir meðferð. Hann hverfur með tímanum en það getur tekið nokkrar vikur/mánuði. Hnúðar geta verið til staðar á meðferðarsvæði, en leysast jafnan upp á u.þ.b. mánuði.

Sé þörf á verkjastillingu eftir meðferð er mælt með inntöku á verkjalyfinu Paracetamol. Við notkun á barnamagnyl eða öðrum blóðþynnandi lyfjum er hætta á aukinni blæðingu og mari frá stungustað.

Eftir meðferð þarf að:

  • Kæla meðferðarsvæði 2-3x á dag í 10 mínútur í senn fyrstu 2-3 dagana eftir meðferð.
  • Drekka vel af vatni, sérstaklega á meðan bólga er til staðar.
  • Nota stuðningsflíkur á meðferðarsvæði allan sólarhringinn í 3 daga eftir meðferð og í 12 klst á dag í viku til viðbótar.
  • Einungis nota mildar og græðandi húðvörur á meðferðarsvæði í a.m.k. viku.
  • Forðast sól, öfgakennd veðurskilyrði, ljósabekki og gufuböð í a.m.k. 2 daga. Myndist mar skal forðast framangreint á meðan meðferðarsvæði jafnar sig til að koma í veg fyrir litabreytingar.
  • Nota a.m.k. SPF 30 sólarvörn á meðan meðferðarsvæði jafnar sig.
  • Forðast áreynslu, sund og neyslu áfengis í 24 klst. eftir meðferð.
  • Sleppa húðmeðferðum á meðferðarsvæði í 6 vikur eftir meðferð.

Einnig er hægt að bóka tíma í síma
533-1320