Í fyrsta skrefi meðferðarinnar eru dauðar húðfrumur fjarlægðar af yfirborði húðarinnar, svitaholur opnaðar og úrgangur og óhreinindi í svitaholum brotin niður með mildri slípun og notkun AHA sýra.

Í öðru skrefi meðferðarinnar eru sog og BHA sýra notuð til að djúphreinsa húðina án þess að valda ertingu og losa um og fjarlægja óhreinindi og úrgang.

Í þriðja og síðasta skrefi meðferðarinnar er andoxandi og kollagenríku serumi þrýst niður í húðina til að vernda hana og gefa henni aukinn raka og teygjanleika.

Tilgangur Lúxus Húðslípunar

Lúxus Húðslípun er örugg og alhliða meðferð sem veitir húðinni allt í senn slípun, hreinsun, raka og næringu. Meðferðin hentar öllum aldurshópum og húðgerðum enda má aðlaga hana að mismunandi húðvandamálum og húðgerðum. Hún er mild og hentar því vel viðkvæmri húð en einnig rósroðahúð og bóluhúð (e. acne) enda hefur hún bólgueyðandi og róandi áhrif á húðina.

Meðferðin flýtir endurnýjunarferli húðarinnar, örvar nýmyndun kollagens og blóðflæði til húðar og skilar sér þar með í mýkri og sléttari húð og grynnri hrukkum og línum. Hún jafnar auk þess húðlit og áferð húðar, gefur henni góðan raka og hreinsar hana af óhreinindum. Hreinsun á yfirborði húðarinnar gerir það að verkum að húðvörur smjúga betur inn í húðina og skila betri virkni.

Gefðu þurri og líflausri húð raka og næringu

Ávaxtasýrur og næringarserum vinna sameiginlega að því að auka rakastig húðar og mynda filmu yfir henni sem kemur í veg fyrir rakatap. Meðferðin hefur einnig róandi og bólgueyðandi áhrif og dregur því úr kláða og ertingu sem oft fylgir þurri húð. Raki og ýmis

næringarefni fríska upp á þurra, þreytta og líflausa húð og gefa henni heilbrigt yfirbragð og fallegan ljóma á meðan mild slípun og ávaxtasýrur örva blóðflæði og endurnýjunarferli húðar. Stök meðferð getur dugað til að fríska upp á þurra og líflausa húð en til að viðhalda árangrinum er gott að koma í meðferð á 1-2 mánaða fresti.

Hreinsaðu húðina og komdu jafnvægi á hana

Mild slípun, öflugt sog og ávaxtasýrur vinna saman að því að fjarlægja dauðar húðfrumur, óhreinindi og úrgang af yfirborði húðar, úr svitaholum og hrukkum og línum. Meðferðin hefur sótthreinsandi eiginleika sem draga úr líkum á bólumyndun, auk þess að koma jafnvægi á sýrustig húðar og olíuframleiðslu hennar. Bólgueyðandi eiginleikar meðferðarinnar hafa einnig róandi áhrif á bóluhúð. Gott er að taka að lágmarki 4-6 meðferðir með 2-4 vikna millibili til að vinna á óhreinni húð og bóluvandamálum. Mælt er með að ráðfæra sig við meðferðaraðila áður en meðferð er bókuð sértu á bólulyfjum.

Jafnaðu áferð og húðtón

Lúxus Húðslípun mildar litabreytingar í húð, t.d. sólarskemmdir og öldrunarbletti, og gerir húðina bjartari. Hún jafnar einnig áferð húðarinnar, mýkir hana, sléttir og þéttir, auk þess að draga úr sýnileika grófra svitahola. Gott er að taka að lágmarki 4-6 meðferðir með 2-4 vikna millibili til að jafna áferð og húðtón.

Dragðu úr og spornaðu gegn öldrun húðar

Lúxus Húðslípun er sérlega góð meðferð til að viðhalda heilbrigði húðar og sporna gegn öldrun hennar. Meðferðin örvar nýmyndun húðfrumna og framleiðslu kollagens og elastíns, sem gerir það að verkum að húðin viðheldur betur þéttleika og teygjanleika, auk þess sem hrukkur og fínar línur mildast. Meðferðin dregur einnig úr litabreytingum vegna öldrunar. Til að viðhalda heilbrigðri húð og sporna gegn öldrun er mælt með að koma í meðferðina á 1-2 mánaða fresti.

Almennar upplýsingar til að hafa í huga fyrir og eftir Lúxus Húðslípun

Fjöldi meðferða: Til að fríska upp á þreytta og líflausa húð næst góður árangur eftir stakt skipti og sést árangur strax að meðferð lokinni. Til að vinna á óhreinindum eða öðrum húðvandamálum er hins vegar mælt með að teknar séu að lágmarki 4-6 meðferðir með 2-4 vikna millibili til að ná sem bestum árangri. Ef húð er án sérstakra vandamála og ætlunin einungis að viðhalda árangri og halda húðinni ferskri, hreinni og vel nærðri er gott að endurtaka meðferðina á 1-2 mánaða fresti.

Fyrir meðferð: Mælt er með að raka skegg fyrir meðferð.

Eftir meðferð: Í flestum tilfellum er einungis um að ræða hita og roða í húð samdægurs. Sé húð mjög viðkvæm geta myndast grunnir marpunktar þar sem húðin er þynnst, en þeir hverfa smám saman á nokkrum dögum. Meðferðin veldur ekki ertingu eða öðrum aukaverkunum.

Mælt er með því að bera gott rakakrem á meðferðarsvæðið tvisvar á dag í a.m.k. viku. Húðin er viðkvæmari fyrir sól fyrst eftir meðferð og því er mælt með að nota sterka sólarvörn og forðast sól eins og hægt er fyrstu vikuna eftir meðferð. Gott er að sleppa líkamsrækt og sundi í sólarhring eftir meðferð.

Lúxus Húðslípun hentar vel samhliða öðrum húðmeðferðum

Lúxus Húðslípun hentar vel samhliða mörgum húðmeðferðum. Húðmeðferðir skila almennt betri árangri þegar rakastig húðar er gott og er Lúxus Húðslípun því gjarnan notuð til að undirbúa húð fyrir lasermeðferðir og auka áhrif þeirra. Hægt er að leita ráðgjafar hjá sérfræðingum Húðfegrunar til að finna þær meðferðasamsetningar sem henta þinni húð best. Dæmi um meðferðir sem henta alltaf vel samhliða Lúxus Húðslípun eru t.d. Laserlyfting, Gelísprautun, Húðslípun og Rósroðameðferð.